IMĦABBA MGĦIXA B’MOD KONKRET FIL-MILIED. L-IKLA TAL-MILIED TA’ CARITAS MALTA TAGĦLAQ 10 SNIN

Caritas Malta qed tistieden lill-persuni li jinsabu weħidhom jew m’għandhomx il-mezzi biex għal sena oħra jqattgħu Milied b’dinjità u jiġu jieklu flimkien għall-ikla tal-Milied fil-Kurja tal-Arċisqof fil-Furjana. Din l-ikla qed tiċċelebra l-għaxar sena tagħha u hi turija ta’ mħabba mgħixa fil-konkret u sinjal tanġibbli ta’ Knisja li tilqa’ lil kulħadd.
L-Isqof Awżiljarju Joseph Galea-Curmi qal li l-ikla tal-Milied organizzata mill-Caritas “hija sinjal sabiħ ħafna tal-impenn tal-Knisja f’Malta tul is-sena kollha, speċjalment fil-ġurnata għażiża tal-Milied, biex ħadd ma jħossu waħdu”. Spjega li l-ikla ssir fil-Kurja tal-Arċisqof b’għażla għax hi l-post ċentrali tal-Arċidjoċesi u “fil-Milied, meta nfakkru l-akbar ġrajja ta’ mħabba ta’ Alla li sar bniedem fostna, aħna nuru fejn qiegħda l-qalb tal-Knisja f’Malta, qalb li dejjem tħabbat bi mħabba kbira għal dawk li huma fil-bżonn u tilqagħhom f’darha”.
Irringrazzja lill-voluntiera kollha li jgħinu biex isseħħ din l-ikla kif ukoll dawk li jieħdu ħsieb iqassmu l-ikla tal-Milied direttament lill-familji fil-bżonn f’diversi parroċċi f’Malta.
Id-Direttur ta’ Caritas Malta, Anthony Gatt, tkellem dwar esperjenzi ta’ persuni li jesprimu l-ferħ li ġġibilhom din l-ikla. Semma kif persuna li attendiet l-ikla qaltlu: “Mindu mietet il-mara spiċċajt waħdi niekol toast fil-Milied, nitlob li jfittex jgħaddi. Meta ingħaqadt magħkom erġajt ħassejt l-imħabba u l-ferħ li jġib dan il-jum tant sabiħ.”
Is-Sur Gatt irringrazzja lit-task force li jiltaqa’ għal diversi ġimgħat biex isiru l-preparamenti meħtieġa għal din l-ikla. Kompla jispjega li din l-ikla ma tkunx possibbli mingħajr is-sapport ta’ The Alfred Mizzi Foundation li jipprovdu l-ikel kollu, lill-President ta’ Malta li permezz tal-kċina tal-President jiġi ppreparat il-ħelu kollu li jitqassam wara l-ikel u St Peter Foundation għas-sapport fil-loġistika. Żied jgħid li din is-sena se tintrema tinda kbira fil-bitħa tal-Kurja, grazzi għal TEC Ltd u icreate, bl-għan li jiżdied l-ispazju peress li maħsub li jiżdied in-numru tan-nies għall-ikla.
Għal sena oħra, l-ikel se jkun preparat minn The Alfred Mizzi Foundation. Is-Sur Julian Sammut, Chairperson ta’ The Alfred Mizzi Foundation, qal: “Għalina l-Milied u l-ispirtu
tiegħu jibda kmieni bit-tħejjija għal din l-ikla li din is-sena qed nippreparaw permezz ta’ Vecchia Napoli. Bħala tim jippreparaw l-ikel kollu b’mod volontarju għal madwar 600 persuna li jinkludi soppa tal-ħaxix frisk u dundjan tradizzjonali mimli servut bil-patata u l-ħaxix”. Semma wkoll li jitqassmu wkoll madwar 500 ikla fid-djar ta’ dawk li ma jistgħux joħorġu. Din is-sena b’kollox se jisservew ’il fuq minn 1,000 ikla.
Bħas-snin ta’ qabel l-band X-Tend se tattendi biex tferraħ lil dawk li qed jattendu.
Kull min għaddej minn żmien ta’ solitudni jew m’għandux il-mezzi finanzjarji biex jagħmel l-ikla tal-Milied, jista’ jingħaqad għall-ikla ta’ nofsinhar fil-Kurja tal-Arċisqof f’Jum il-Milied, billi jċempel fuq 79555915 jew jibgħat fuq info@caritasmalta.org jew permezz tal-paġna fuq Facebook ta’ Caritas Malta.